[本港新聞] 記者食風勇救 CCTVB(視頻)

隔牆有網：記者食風勇救 CCTVB

記者潘蔚林面容扭曲做直播，老外在旁豎起拇指鼓勵。

一個是旦男，令無綫新聞受盡「是是旦旦」嘅批評，但原來做六四新聞做得是是旦旦嘅 CCTVB，做颱風新聞卻非常嚴謹。噚日凌晨記者潘蔚林冒住九號風球喺尖沙嘴做直播，俾莫拉菲吹甩頭盔同隻鞋都在所不計，紮住馬同颱風鬥力，無非想如實報道個風真係好勁，唔少網民讚佢專業，算係為 CCTVB嚟個小平反。

嗌到聲都拆晒
被風吹走隻鞋，潘蔚林索性赤腳上鏡。

莫拉菲高調襲港，好多市民都已經上床大被冚過頭，但潘蔚林就被公司派去尖沙嘴天星碼頭迎接颱風蒞臨。唔知係咪佢體形比較鋼條，難以抵擋莫拉菲嘅來勢洶洶，所以着上黃色雨衣、戴住黃色頭盔嘅佢做直播時幾乎企唔穩，一度要撐大腳紮行馬報道，再用嗌到拆晒嘅聲線講述現場情況，攝影師更捕捉到佢俾大風吹走頭盔同其中一隻鞋嘅狼狽樣。網友踴躍放片段上網， YouTube噚晚已經有 20條片。
有網民喺網上留言，大讚潘蔚林專業，為事事旦旦嘅無綫平反咗。有高登網友開咗個 post討論呢單嘢，好多網民都話潘蔚林好專業；有人笑佢紮馬報新聞比較騎呢，但有人覺得佢馬步好穩，似乎食過夜粥。

老外紋風不動
踎喺度唞吓，點知頭盔都吹走埋。

當然亦有網民覺得潘蔚林太誇張、博上位，因為期間有個老外喺佢做 live時行過佢身邊，完全好似平日行路咁 easy，同潘蔚林側晒身面容扭曲好大對比。好多網民為佢抱不平：「有得畀佢哋揀，你估佢會想出去吹風咩？」有人力撐「記者都係人，企唔穩有乜問題？」
無綫記者近期都算高風險，做親直播都驚俾市民突襲出鏡拉 Banner。浸會大學新聞系助理教授杜耀明噚日出席港台節目《城市論壇》，話市民對無綫積怨已到極點，希望佢哋就處理新聞手法舉行公聽會，以免更多「是旦男」乘 live而入。出席同一論壇嘅記者協會主席麥燕庭表明唔支持「是旦男」舉動，指前線記者只係執行工作，市民有不滿應該去電視台搵負責人同老闆表達。